Bi de Rieselwischen an de Seev up'n Wiedenhoff in Lüll (Lüllau) bi Jesborg ward wi wies, woans fröher Wischen mit Water versorgt worden sünd. Mit düsse Form vun Bueree, de dörch de Industrie verännert wörr, kunnen de Wischen kuntrolleert mit Water versorgt warrn.

De Technik hett aber nich blots för dat Water sorgt, dat nödig weer, se hett ok den Grund reinigt un mit Nährstoffen versorgt, de he as Dünger bruken dä.

De Rieselwischen, de dat in Middeleuropa fröher meist öberall geev, sünd hüüt kuum noch to finnen. Dat süht so ut, as wenn dat Prinzip in't 15. Johrhunnert öber de Alpen na Noorddüütschland kamen is, wo de Beken in de Heid mit jüm ehr Water, dat Gefäll un de Wischen ümto besünners goot dorto passen dään. Dörch de Rieselwischen kunnen de Buern up den Grund, de nich veel hergeev, veel mehr Klever oornen un so Rinnerraßen holen, de mehr Melk geben dään. Wo veel dat  fröher för de Weertschop dedüden dä, künnt wi dor an seihn, dat 1854 in Suderburg in'n Landkreis Uelzen en School för den Utbo vun Wischen gründt worden is.

Bi düsse Kulturtechnik is de Landschop mit Rüchen un Grabens in de Wischen neet formt worden. Langs de Beete, de sik wölben dään, wöörn Grabens trocken, in de dat Water to- un aflopen kunn. Mit Slüsen kunn dat Water kuntrolleert warrn. Dat anstaute Water ut'n Beek wöör öber en System vun Rönnen up de Scheitel vun de wölvten Wischen leit't, riesel de Rüchen vun de Wischen rünner und lööp över Rönnen af.

De Weertschop änner sik, un dat Ünnerholen vun dat System maak veel to veel Arbeit. Dorüm sünd meist alle Rieselwischen na den Tweten Weltkrieg stillleggt worrn.

Apen
Dat ganze Johr öber, Führungen mutt'n afsnacken.

Anfohrt
A7, Utfohrt Ramßel (Ramelsloh) oder A1, Hittfeld, na Jesborg (Jesteburg), vun dor na Bookholt (Buchholz) to. De Rieselwischen liggt twüschen Jesborg un Lüll (Lüllau).

De Intritt köst nix.

Ansnacken künnt Se
Perfesser Dr. Rolf Wiese
Klöönkassen (0 40) 79 01 76-40
wiese[at]kiekeberg-museum[dot]de