De Kraft vun dat Water is in de fröhe Tiet vun de Industrie de wichtigst Energie we'en. Dor sünd Textilmaschinen mit andreven worrn so as ok Hammerwarken, mit de dat Metall bearbeidt worrn is. Ok de Möhl in Wulfsen in'n Süden vun Winsen na de Luh hett en ganze Reeg produzeert: hier is Mehl un Schroot mahlt, Graupen un Grütt schellt, Öl slaan, Loh stampt un Filz bookt worrn.

In Wulfsen künnt wi seihn, wat in't 19. Johrhunnert in'n Noorden vun Neddersassen tohoop höört hett: de Möhl, dat Saagwark un dat Wahnhuus vun den Möller. Wi glöövt, dat dat an düsse Steed al vun dat 13. Johrhunnert an en Watermöhl geven hett. Wat wi hüüt as Möhlenhuus an de Au seiht, de to en Möhlendiek anstaut is, stammt vun 1856. De Bowies is upwendig, un dat Wahnhuus is as en Villa herricht. - Dat wiest uns: de Möller harr wat an de Hacken. 1859 is dat Saagwark as en eenfachen Zweckbo to den Bedriev dortokamen. Dat Saagwark is - so as de Möhl ok - mit de Kraft vun Water andreven worrn.

De Möller kunn mit dat Verbinnen vun Koornmöhl un Saagwark seker ween, dat he jümmers wat verdenen kunn. Wenn de Möhl nich lopen dä, kunn he dat Saaggatter bedrieven. Blangenbi hett he sien Bedriev jümmers weer moderniseert: 1909 hett he dat Waterrad dörch en Turbien ersett. Vun 1920 bet 1939 hett he Strom för sien Bedriev un för de Nahberschop produzeert. In de sösstiger Johrn vun't letzte Johrhunnert is de Bedriev instellt worden. Blots dat Saagwark bleev noch över.

Apen
Dat ganze Johr, Führungen mööt afsnackt warrn

Anfohrt
A7, Utfohrt Herdenkaben (Thieshope), vun Herdenkaben wieter na Parrns (Pattensen) un denn na Wulfsen afbögen. Dat Saagwark steiht an'n Möhlendiek.

De Intritt köst nix.

Ansnacken künnt Se
Perfesser Dr. Rolf Wiese
Klöönkassen (0 40) 79 01 76 - 40
wiese[at]kiekeberg-museum[dot]de