Vun 1881 an gifft dat dat Klinkerwark Rusch in Drochtersen-Ritsch in’t Kehdinger Land. So üm un bi 1900 weer düt Wark een vun över hunnert Tegeleen an de Ünnerelv, de meist all tohoop vun de Maschbuern up jüm ehr egen Land  bedreven  worrn sünd. In de Twüschentiet ward düt Wark vun de veerte Generatschon bedreven. Dat is de eenzige Tegelee twüschen Elv un Weser un de eenzige Bedriev in Noorddüütschland, wo noch mit den traditschonellen Ringaben arbeidt ward. An bestimmte Daag in’t Johr maakt dat Klinkerwark sien Dören apen, un de Besökers künnt sik en Bild vun  de Oort un Wies maken, mit de fröher Tegels maakt worrn sünd. Ok to anner Tieden künnt Schoolklassen un anner Gruppen vun Besökers de Tegelee nipp un nau ankieken, wenn se sik anmellt.

Tegelee Rusch
Ritscher Butendiek 2
21706 Drochtersen
Klöönkassen (0 41 48) 61 01 30
www.ringofenklinker.de

Apen (Museumsdaag 2011)
Dönnerdag, 28. Juli (Pötterdag), vun Klock tein bet Klock veer
Sünndag, 11. September (Dag vun dat apen Denkmal), vun Klock ölben bet Klock veer

Anfohrt
B73 na Cuxhaven to. Vör Staad (Stade) vun de B73 up de L111 afbögen. Na 20 km sünd Se bi dat Dörp Ritsch. Dor föhrt Se dörch bet to Enn. Bi’t Ortsschild böögt Se na rechts af, un na ca. 300 m kaamt Se bi de Tegelee Rusch an.

Wischhaben (Wischhafen) bi de Fähr öber de Elv: Se föhrt vun de Fähr rünner un böögt na ca. 500 m links up de L111 af. Na ca. 15 km kaamt Se in Ritsch an. Glieks bi’t Ortsschild böögt Se na links af. Na ca. 300 m sünd Se bi de Tegelee Rusch ankamen.

Intritt 
Grote Lüüd 3 Euro 
Besökers ünner 18 Johr un Maten vun’n Fördervereen bruukt nix to betahl.